हडपसर विधानसभा निवडणुकीत मुस्लिम समाजाला प्रतिनिधित्व द्या; ॲड अय्युब शेख यांच्या उमेदवारीसाठी मुस्लिम समाजाचे शरद पवार यांना साकडे

Muslim Community Appeals to Sharad Pawar for Advocate Ayub Sheikh’s Candidature from Hadapsar Assembly Seat

चाळीस वर्षांपासून मुस्लिम समाजाचा राजकीय वनवास : अमिनुद्दिन पेनवाले यांच्या नंतर विधानसभेत समाजाला प्रतिनिधित्व नाही

पुणे: आगामी 2024 च्या विधानसभा निवडणुकीत हडपसर विधानसभा मतदारसंघातून मुस्लिम समाजाचे सुशिक्षित उमेदवार ॲड अय्युब शेख यांना उमेदवारी देण्यात यावी, अशी मागणी पुणे शहर मुस्लिम समाजाच्या वतीने करण्यात आली आहे. निसर्ग मंगल कार्यालयात आयोजित केलेल्या बैठकीत पुण्याच्या विविध भागांतून आलेल्या मुस्लिम धर्मगुरू, सामाजिक कार्यकर्ते, व्यापारी आणि राजकीय नेत्यांनी राष्ट्रवादी काँग्रेसचे सर्वेसर्वा पद्मविभूषण शरद पवार यांच्याकडे ही मागणी केली.

बैठकीत मुस्लिम समाजाने व्यक्त केलेली भूमिका अशी होती की, चाळीस वर्षांपूर्वी पुण्यातून मुस्लिम समाजाचा एकमेव आमदार, अमिनुद्दिन पेनवाले, निवडून आले होते. त्यानंतर, पुण्याच्या राजकीय पटावर मुस्लिम समाजाला कधीही योग्य प्रतिनिधित्व मिळाले नाही. हडपसर मतदारसंघात मुस्लिम समाजाची लक्षणीय संख्या असूनही, त्यांना आजवर सत्तेत प्रत्यक्ष भागीदारी मिळाली नाही.

मुस्लिम समाजाची मागणी:

मुस्लिम समाजाच्या प्रतिनिधींनी महाविकास आघाडी सरकारच्या वतीने यावेळी हडपसर मतदारसंघातून ॲड अय्युब शेख यांना उमेदवारी द्यावी, अशी एकमुखी मागणी केली. या बैठकीत मौलाना निजामुद्दीन फखरुद्दीन, मौलाना कारी इद्रिस अन्सारी, दी मुस्लिम को-ऑपरेटिव्ह बँकेचे व्हाईस चेअरमन अलीरजा इनामदार, मौलाना आझाद असोसिएशन चे अध्यक्ष अमानत शेख, सामाजिक कार्यकर्ता अंजुम इनामदार, मुस्लिम बँक संचालक सईद सय्यद, बबलू सय्यद, आणि ऑल इंडिया मुस्लिम ओबीसी संघटनेचे इकबाल अन्सारी, हाजी गुलाम अहमद एज्युकेशन ट्रस्टचे मशकूर शेख, काँग्रेस पक्ष अल्पसंख्याक सेलचे नदीम मुजावर, मुस्लिम चेंबर ऑफ कॉमर्सचे गफ्फर सागर, नगरसेविका फरजाना शेख, जय हिंद महिला उद्योग संघटनेच्या अनिसा खान, आणि रिटायर्ड एसीपी जान मोहम्मद पठाण यांच्यासह विविध मान्यवर उपस्थित होते.

प्रमुख वक्त्यांनी उपस्थित मुस्लिम समुदायाच्या भावना व्यक्त करताना सांगितले की, पुण्यातील मुस्लिम समाजाने आजपर्यंत काँग्रेस आणि राष्ट्रवादी काँग्रेस पक्षाला प्रामाणिकपणे पाठिंबा दिला आहे, परंतु सत्तेत भागीदारीची मागणी आता निकडीची झाली आहे. ॲड अय्युब शेख हे एक सुशिक्षित, समाजाभिमुख, आणि सर्वसमावेशक विचारसरणीचे नेते असून ते हडपसर विधानसभा मतदारसंघातील मुस्लिम समुदायाचे प्रभावी नेतृत्व करू शकतात.

शरद पवार यांची प्रतिक्रिया:
मुस्लिम समाजाच्या या मागणीला उत्तर देताना शरद पवार यांनी केंद्र सरकारच्या धर्मनिरपेक्ष धोरणावर टीका केली. त्यांनी सांगितले की, गेल्या दहा वर्षांत केंद्र सरकारने हिंदू-मुस्लिम समाजामध्ये फूट पाडण्याचे धोरण स्वीकारले आहे. त्यांनी नुकत्याच झालेल्या लोकसभा निवडणुकीत मुस्लिम समाजाने धर्मांध शक्तींना रोखण्यासाठी मोठे योगदान दिले, आणि याच प्रकारे आगामी विधानसभा निवडणुकीतही मुस्लिम समाजाने धर्मनिरपेक्ष पक्षांना पाठिंबा देण्याचे आवाहन केले.

पवार यांनी मुस्लिम समुदायाला आश्वासन दिले की, तिन्ही पक्ष महाविकास आघाडी अंतर्गत लवकरच विधानसभा निवडणुकीसाठी उमेदवारीचे निर्णय घेतील. त्यांनी असेही स्पष्ट केले की, या निवडणुकीत मुस्लिम समाजाच्या प्रतिनिधित्वाला विशेष महत्त्व दिले जाईल आणि जास्तीत जास्त मुस्लिम आमदार विधानसभा निवडून जाण्याच्या दृष्टीने प्रयत्न केले जातील. यासाठी महाविकास आघाडी एकत्रितपणे योग्य तो निर्णय घेईल.

Muslim Community Appeals to Sharad Pawar for Advocate Ayub Sheikh’s Candidature from Hadapsar Assembly Seat

The Muslim community in Pune has appealed to Sharad Pawar to nominate Advocate Ayub Sheikh as the candidate for the Hadapsar constituency in the upcoming 2024 Maharashtra Assembly elections. They emphasized the need for Muslim representation in power, pointing out that no Muslim has been elected as an MLA from Pune in over 40 years. During a meeting attended by various religious leaders, social activists, and political figures, Pawar assured the community that the Mahavikas Aghadi alliance would seriously consider their demand for greater Muslim representation in the legislature.

Hadapsar Assembly Election 2024, Advocate Ayub Sheikh candidature, Sharad Pawar Muslim candidate, Maharashtra Assembly Elections 2024, Muslim community representation, Mahavikas Aghadi Muslim candidate, Pune Muslim political leadership, Sharad Pawar Hadapsar constituency, Pune Muslim assembly elections.