मेट्रोमनी साईटवरुन महिलांची फसवणूक करणारा सराईत गुन्हेगार काळेपडळ पोलिसांच्या जाळ्यात

इंदूर, मध्यप्रदेश येथून अटक; ४५ लाख रुपयांची आर्थिक फसवणूक उघड…

Kalepadal Police Nabs Serial Fraudster Targeting Women on Matrimonial Sites

महत्वाचे आणि विश्वसनीय अपडेट साठी WhatsApp ग्रुप जॉईन करा =>https://ln.run/MCeiB

पुणे, ७ फेब्रुवारी २०२५ – मेट्रोमनी साईटवर बनावट ओळख तयार करून महिलांची फसवणूक करणाऱ्या सराईत गुन्हेगाराला काळेपडळ पोलिसांनी इंदूर, मध्यप्रदेश येथून अटक केली. आरोपीने एका महिलेला लग्नाचे खोटे आश्वासन देऊन तिच्यासोबत शारीरिक संबंध प्रस्थापित केले आणि तिच्या विश्वासाचा गैरफायदा घेत ४५ लाख रुपयांची आर्थिक फसवणूक केल्याचा प्रकार उघड झाला आहे.

महिला फिर्यादीची ऑनलाईन फसवणूक

गुन्हा रजिस्टर नं. १९१९/२०२४, भा.दं.वि. कलम ३७६, ३७६(२)(एन), ४२० अंतर्गत सदर प्रकरण नोंदवण्यात आले आहे. आरोपी अमन प्रेमलाल वर्मा (वय ३८, रा. जम्मू-काश्मीर) याने संगम डॉट कॉम मेट्रोमनी साईटच्या माध्यमातून महिलेच्या संपर्कात येऊन तिला लग्नाचे आश्वासन दिले. तिच्याशी जवळीक साधत तिच्यावर विश्वास संपादन केला. मात्र, काही काळानंतर त्याने ऑनलाईन आणि रोख स्वरूपात तब्बल ४५ लाख रुपये उकळून तिला फसवले.

अनेक राज्यांमध्ये गुन्हे दाखल; सराईत गुन्हेगार असल्याचे स्पष्ट

काळेपडळ पोलिसांच्या तपासात आरोपी सराईत गुन्हेगार असल्याचे समोर आले आहे. तो सोशल मीडियावर आणि मेट्रोमनी साईटवर बनावट प्रोफाइल तयार करून महिलांशी मैत्री करत असे. त्यांच्या भावनांचा गैरफायदा घेत, त्यांच्याशी शारीरिक संबंध ठेवून त्यांना ब्लॅकमेल करत आणि त्यांच्याकडून मोठ्या रकमेची फसवणूक करत असे.

आरोपीविरुद्ध दिल्ली, फरीदाबाद, भोपाळ आणि इंदूर या शहरांमध्ये देखील गुन्हे दाखल असल्याचे पोलिस तपासात उघड झाले आहे.

इंदूर येथे सापळा रचून अटक

गुप्त माहितीच्या आधारे काळेपडळ पोलिसांना समजले की आरोपी इंदूर, मध्यप्रदेश येथे येणार आहे. वरिष्ठ अधिकाऱ्यांच्या परवानगीने विशेष पथक इंदूरला रवाना झाले. स्थानिक पोलिसांच्या मदतीने तांत्रिक तपास आणि गुप्त बातमीदाराच्या माहितीच्या आधारे आरोपीला ताब्यात घेण्यात आले. त्यानंतर त्याला पुण्यात आणून अटक करण्यात आली.

पोलिस कोठडी मंजूर; पुढील तपास सुरू

अटक झाल्यानंतर आरोपीला न्यायालयात हजर करण्यात आले. १० फेब्रुवारी २०२५ पर्यंत पोलिस कोठडी मंजूर झाली असून, पुढील तपास सहाय्यक पोलिस निरीक्षक विलास सुतार करीत आहेत.

पोलीस अधिकाऱ्यांचे मार्गदर्शन आणि विशेष पथकाची उल्लेखनीय कामगिरी

ही कारवाई पुणे शहराचे पोलिस आयुक्त अमितेश कुमार, सहआयुक्त रंजनकुमार शर्मा, अप्पर पोलिस आयुक्त मनोज पाटील, परिमंडळ ५ चे पोलिस उपआयुक्त राजकुमार शिंदे आणि वानवडी विभागाचे सहाय्यक पोलिस आयुक्त धन्यकुमार गोडसे यांच्या मार्गदर्शनाखाली करण्यात आली.

विशेष पथकात काळेपडळ पोलिस ठाण्याचे वरिष्ठ पोलिस निरीक्षक मानसिंग पाटील, सहाय्यक पोलिस निरीक्षक विलास सुतार, पोलिस हवालदार युवराज दुधाळ आणि पोलिस अंमलदार श्रीकृष्ण खोकले यांनी उल्लेखनीय कामगिरी बजावली.

महिलांनी सतर्क राहण्याचे आवाहन

पोलिसांनी नागरिकांना आणि विशेषतः महिलांना ऑनलाईन विवाहस्थळे आणि सोशल मीडियावरील अनोळखी व्यक्तींशी जपून वागण्याचा इशारा दिला आहे. कोणालाही मोठी रक्कम देण्यापूर्वी त्याच्या पार्श्वभूमीची खात्री करणे अत्यंत गरजेचे आहे